Baggersee 2 „Em Wenter“

Sammschdig isch, on dr Hemmel blau
draußa liegt au Schnee wiad Sau
bevor i romsitz ond eich bloß Nerv,
komm fahr mr schnell noch Obersderf
Skilanglaufa isch dort bsonders schee,
hondert Loipa ond an jenseits Schnee.

Bei 10 grad minus, i ben guat drauf,
Schraub i an Skikoffer aufs Autodach nauf,
ond scho han i die Fenger neiklemmt,
daß Blut bis zu de Elleboga rennt,
doch was net tötet härtet ab,
glei ischs soweit,mir fahrat ab.

Doch om Hemmelswella wo han i die Skistöck abgstellt
die han ich doch s letschmol zu den Ski drzu gstellt.
Mei Schimütz die isch au et do, wo isch die denn bloß,
ja herrrgottnei kommat mir heit au no los,
s Radio ogmocht, grad gibt es koin Stau,
nei en dr Karra, dr Hemmel isch no blau,
Auf dr A 8 henter Weilheim, ha des glaubscho de nicht,
koin Stau isch gmeldet, aber dort isch alles dicht.

Noch oiahalb Stond 10 Kilometer weiter,
wenn so weitergoht wird des heit noch heiter,
en Gruibinga kenna mr endlich raus,die Fahrerei isch mir an graus,
komm kehra mr irgendwo zum Mittagessa ei,
noch Obersdorf fahr mr halt später nei.

Ons winkt a tolle Kneipe, do hock mr nei,
a Schnitzel mit Pommes, des muß jetzt sei,
was 25 Euro, i glaub der schbennt,
der klaut oim no des letzte Hemd,
jetzt drucksch halt nonder, i han scho emmer gwißt,
dasß Schifahra scheißteuer ischd.

Am späte Nachmittag wieder auf Autobo,
s goht alles ganz langsam, obends komma mr oh.
Mir fahre wird’s heit nix me, dr Tag isch scho vorbei,
s isch guat, daß i mi jetzt auf morga freu,
s Hotel isch ziemlich teuer, ond s isch alles voll,
i han mirs andersch vorgestellt, s isch alles ned so toll
ond schlofa kosch scho gar ned, denn die Heizung rattert laut,
ond onda tobt dr Apreski bis daß dr morga graut.

Sonntig früh zum Fenschter naus guckt,
des gibt’s noch ned i werd verruckt,
draußa schneits was raakoo, ach du liebe Not,
so daß es mit dem Skifahra gar ned goht,
komm gang mr wenigschdens ens Hallabad,
damit sich die Fahrerei glohnat hot.

Doch die Schlang an dr Kass isch elend lang,
do wird mr jetzt scho angsch ond bang,
komm fahr mr hoim, des lohnt sich ned,
der Krach do dren, o wirsch jo bled,
des Wochanenden hot mir alle Nerva gschtohla,
jetzt ko i mi wieder beim Schaffa erhola.







Wir nutzen Cookies auf unserer Website um diese laufend für Sie zu verbessern. Mehr erfahren