Baggersee

Sonntich ischs onds Wetter ok
komm mir fahrat heit an dr Baggersee
I mecht säh ob au des Schwemma no goht
ond ob mir no mei Badhos schtoht
Beim Schwemma war mr jo scho lang nemme
komm mir fahrat heit an dr Baggersee.

Aber zwoi Kilometer vor em See
I glaub i trau meine Auga nemmee
I säh bloß no Audo, s duat sich schtaua ond schtaua
schtaua ond schtaua, schtaua ond schtaua
Mir sen ned die Oinzige mit der Idee
älle wellat heit an dr Baggersee.

An Kilometer goht`s hendare, an schmala Waldpfad
dort kommt dann an Parkplatz, koscht a Mark für dr Dag
aber s`goht grad nemme weider, i glaub, dort isch scho voll
ond die erschde kommat wieder z`rick
I woiß gar ned was i macha soll.
Ond Hitz schteigt em Auto ond dr Schwoiß bricht mr aus
o lasset mi doch endlich aus dem Schwitzkaschda naus.
Omdreha goht au ned, der Weg isch jo so schmal
ond weiter gohts scho lang nemme, so langsam wird a Qual.

Noch oinahalb Schtont ha i jetzt gnuag,
I fahr ronder vom Pfad em Wald hots Platz gnuag.
I fahr en an kloina Seitaweg,
isch zwar „Eifahrt verbota“, i mach`s ohneweg.
Am Sonntich wern die scho koine Schdrofzettel verteila,
i will jetzt ens Wasser drom muss i mi beeila.

Endlich am See schnell a Plätzle gsucht
vor lauter Leit siehsch koi Gras me, bloß ned gflucht
Auf dr oina Seit die Liebespaar, do willsch jo au ned schtöra
auf dr andra Seit die Families mit ihre laute Göra
ond dr oinzig freie Platz isch au ned Ideal
s isch an Ameisahaufa,ach jetzt guck mr halt nomol.

Dann hen mir ons halt irgendwo drzwischa neigsetzt
die hen zwar erschd mol goschat, aber dann hen se nix mei gschwätzt
Jetzt bloß schnell ens Wasser, s isch scho gnuag Zeit verganga
aber wieso isch den der Himmer zmol so donkel ond verhanga.
I will grad ens Wasser schpicka, so kommt scho dr erschde Blitz
s Zeig wieder zemapackt, mit`m Schwemma wird’s wohl nix.
Komm schpreng mr schnell ens Audo, sonsch werd mr au no nass,
ond wenn i erscht mol nass ben, dann krieg i voll der Hass.

Guck no die Lomba, jetzt ko i doch Schtrof zahla
ond raus kommer mr au ned, älle denn se fahra.
Älle hen se Schiß vorm Gwitterle
ond wieder em Schdau ond wieder goht nix me.

Noch oiahalb Schtond sen mr endlich am Haus
ond Schportschau isch mr au wieder naus.
Nächscht Woch bleib i en meine vier Wend
hock mi en`d Badwann nei oder wasch mr wenigschdens d`Hend
Was hot mi der Sonntich wieder Nerva gschdohla
Jetzt ko i mi wieder beim Schaffa erhola.